Aure Séguier
30-04-2012
La montanha de Bugarag, dins Aude, es un endret estonant. Primièr, es una curiositat geologica formada pendent la butada dels Pirenèus. D’efièit, jos la pression, las ròcas se son plissadas o copadas e, fin finala, las jaças mai ancianas se son retrobadas per-dessús las jaças mai recentas.
Un fenomèn qu’a pas mancat d’èsser estudiat per nombroses geològues. Seriá possible que foguèsson totes aqueles scientifics qu’aguèsse causat las primièras rumors. Tant de saberuts acampats, es estranh, « nos an pas tot dit... ». E uèi, nombrosas personas son persuadidas que los extra-terrèstres se passejan sus e dins la montanha. A Esperasan, un vilatge vesin, una associacion recampa totes los testimoniatges de mond qu’an vist OVNIs o lums estranhs a l’entorn del puèg.
Pas sonque d'OVNIs
Mas i auriá pas solament de socopas volantas dins aquela montanha. Per d’unes, Bugarag es una « gara » cap a d’autras dimensions, a mai una pòrta cap al mitic mond sosterren. Per d’autres, s’i traparián d’archius d’un mond desaparegut, lo dels Grands Ancians o dels Atlantes.
D’autres tresaurs s’amagan dins lo puèg. Per d’unes, i auriá lo de l’abat Saunières, mas aquel, tot lo mond sap qu’es enterrat a Rènnas lo Castèl, un vilatge pròche. Mas d’unes pensan que s’i pòt trapar lo Sant Graal, d’autres, mai nombroses, son persuadits que l’Arca de l’aliança i es abrigada. E se cercatz plan, benlèu i traparetz lo quite Crist o encara François Mitterrand.
Dificultats pel vilatge de Bugarag
Dempuèi qualques meses, Bugarag e sas legendas son coneguts internacionalament. Perqué ? Aquel puèg perdut dins las Corbièras seriá lo sol endret ont se poirà escapar a la fin del monde, prevista pels mayas pel 21 decembre de 2012. Se vos i volètz anar abrigar, despachatz-vos, las plaças son caras. Sus un site de venda a l’enquant, dètz plaças de bunker amb la television s’i lògan 35 000 euros lo mes.
Quicòm que preocupa los 200 estatjants del vilatge de Bugarag, al pè del puèg. Los visitaires mistics o esoterics de son mai en mai nombroses a s’installar o a visitar lo canton, e lo prètz de l’immobilièr quita pas de montar. « Se deman, 10 000 personas arriban, coma sèm una comuna de 200 estatjants, poirem pas res far », s’inquièta lo conse de la comuna. A mai, es a portar lo clam contra de sites Internet que vendan en linha de pèiras de Bugarag a 1500 euros lo kilò.
Perqué Bugarag seriá l’illa salvada del cataclisme ? Se sap pas tròp d’ont es partida la rumor. Es solide ligat a totas las legendas que viran a l’entorn del puèg. Mas perqué tant de legendas ? O avèm dit, primièr, Bugarag es geologicament pauc ordinari. Mas es tanben, amb sos 1230 m, lo punt culminant de las Corbièras Nautas, al mitan de puègs de 600 m en mejana. Es isolat, enrodat sonque de valadas. Per aquelas rasons, s’i obsèrvan sovent de fenomèns meteorologics estranhs, coma de bruma jol solelh, o lo puèg que reten los nívols.
Una montanha traucada
A mai, es vertat que i a cavitats dins la montanha. Son nombrosas las galariás ont lo vent bufa del pè al sòm de la montanha. Aquel malhum sosterren es pas encara complètament explorat, çò qu’explica que pas degun a encara trapat lo garatge de la socopa o lo tresaur dels templièrs.
A mai s’avètz pas paur de la fin del mond, i poiretz anar faire un torn. L’ascension del puèg Bugarag es una polida passejada, lo panoramà al som es unenc e lo païsatge fòrça polit. Mas atencion als amators d’excursions jos la nèu : i anetz pas lo 21 de decembre venent, que seretz pas totes sols.