Lo Carnaval de Limós, qu'es aquò ?

Se ditz qu'a la debuta èran de molinièrs que, cada annada, aprèp aver pagadas lors redevenças al monestièr de Prolhas, fasián lo jorn de dimars gras un passa carrièra dins la ciutat en escampant dragèas e farina. Es amb lo vestit d'aquel mestièr qu'a començat lo carnaval de Limós e a l'ora d'ara, son totjorn de molinièrs que ne fan la dubertura en fasent clacar lors foets.

E es la debuta d'un ritual fòrça rigorós. Cada dissabte, cada dimenge, e tanben lo dimars gras, la plaça de la Republica aculhí́s fecas, godilhs, musicians, pel plaser dels estatjants mas tanben del mond exterior que pòdon venir de luènh a l'escasença d'aquel eveniment.

Lo debanament es totjorn lo meteis : tres sortidas : una a 11 h , una a 5 oras del ser e una a 22 h. Los fecas van d'un cafè a l'autre, s'arrèstan un vintenat de minutas dins cadun dels cinc establiments que bòrdan la plaça puèi ne tòrnan sortir. Los musicians e los godilhs que los seguisssn dins lo desfilat los espèran defòra.

Dins un canton, l'òme Carnaval espera lo darrièr jorn ont serà jutjat e cremat per la darrièra banda, pendent que lo mond dançarà la farandòla a l'entorn del lenhièr.

Lo carnaval de Limós es pas un espectacle, de'n primièr perqué la china fa participar l'espectator e crea una intimitat tant coma las dimensions convivialas de la plaça, mas tanben perqué la tòca de las fecas e dels godilhs es pas de se mostrar. S’agís puslèu de perpetuar una tradicion que lor ven de mantun sègles a. Lo mond qu'o va veire se trapa pres dins la magia d'aquela passejada misteriosa e dintra dins un mond que ne sortirà trebolat.